致力保護動物權益嘅善待動物組織「PETA」，一向好鍾意借用電玩遊戲宣傳組織理念，例如批評《Far Cry 6》鬥雞小遊戲過於殘忍、《動物森友會》釣魚及捕蟲系統侵害動物權益、《寵物小精靈》系列令人對動物失去同情心等等。隨住史詩級RPG大作《Elden Ring》問世，佢哋亦把握機會拍片宣傳，不過今次就一改過往強硬態度，並冇批評呢樣嗰樣，而係用一種較為幽默嘅風格呼籲玩家善待動物，唔通《Elden Ring》嘅魔力大到連佢哋都唔想鬧隻Game？

PETA喺宣傳影片向玩家提出五項善待動物建議，分別係帶野狗到湖邊散步、說服騎兵唔好剝削馬匹（然後用盾反將騎兵打落馬）、以安全及尊重嘅距離觀看野生動物（然後用潛行模式繞過熊人）、參觀動物保護區但唔好「出手」（只作防禦，唔斬殺動物），最後一項就係同動物渡過快樂時光，表示交界地所有動物都值得尊重，同時將玩家死亡時會彈出嘅「YOU DIED」字句改成「GO VEGAN」，呼籲大家食素。BTW：見佢盾反時機咁精準，睇嚟PETA應該都係《Elden Ring》Fans，難怪今次冇大鬧隻Game。