隨住Sony蜘蛛俠宇宙（SSU）反英雄電影《Morbius（魔比煞）》將於4月1日上映，日前Jared Leto接受外媒《Variety》專訪時就談及到當今電影業，表示：「若然沒有Marvel電影，我都唔知戲院仲會唔會存在。」並對目前行業生態感到擔憂：「似乎唔係所有電影都有空間(院線)可以上映，呢個情況確實令人心碎。」

事實上，早些年已經有唔少電影人反思強勢嘅英雄電影點樣影響產業，甚至迫走其他類型電影壟斷市場，久而久之令作品類型變得單一。而Jared Leto亦唔係第一位道出呢個問題嘅超級英雄演員，遊走於商業及藝術片嘅Benedict Cumberbatch早排就提及過：「除非你有一位Marvel明星，否則任何一部電影融資都係非常、非常、非常困難。不論個故仔有幾好，演員幾咁有才華，拎過幾多獎。」

《Morbius》由瑞典導演Daniel Espinosa執導，《The Last Witch Hunter（巫間獵人）》編劇檔Matt Sazama及Burk Sharpless撰寫劇本，故事講述患有罕見血液疾病嘅科學家Michael Morbius（Jared Leto飾），為治療自己及擁有相同絕症嘅人，不惜用自己身體做實驗，結果變成擁有超能力嘅吸血鬼，能夠高速移動及飛翔，同埋好似蝙蝠咁用超聲波定位，暫時未知香港幾時上映。