雖然男人成日口講「靚女唔會放屁，女神放屁都係香嘅」，但其實我哋都知屁呢家嘢邊個放都係會臭，同時亦係每個人都必然會有嘅生理現象——所以我哋自己係絕對唔會忍屁嘅！而事實亦證明大家唔應忍屁，因為巴西女歌手Pocah (真名Viviane de Queiroz Pereira)，就因為忍屁忍到入醫院！

在 Instagram 查看這則貼文

POCAH（@pocah）分享的貼文

現年27歲嘅Pocah早前於IG限時動態分享咗自己突然入院嘅情況，最近就解釋返當時發生咩事。原來當日凌晨5點半，瞓緊覺嘅佢突然覺得非常肚痛，於是立即入院，經檢查後醫生話佢肚痛嘅原因係「忍得太多屁」。原來Pocah因為覺得喺男友面前放屁非常羞恥，所以一路都有忍屁嘅習慣，但經過今次事件之後，佢就話自己唔會再忍，亦呼籲其他女仔唔好忍，「因為半夜唔舒服嘈醒你條仔，等佢帶你去醫院後發現原來係忍得太多屁，呢件事係更加羞恥」。

在 Instagram 查看這則貼文

POCAH（@pocah）分享的貼文

據研究指，一個正常人每日平均會放14個屁，而屁講到尾其實就係一堆氣體，忍住唔放就即係於體內儲咗一大堆氣，除咗個肚會漲之外，產生嘅壓力亦會造成不適。更可怕嘅係，啲屁被困於體內後會有部份被重新吸收，最後經呼吸排出體外——簡單啲就即係等同食屁。所以與其去忍屁，練習下控制放屁時嘅聲量、以及放咗之後扮無辜嗰場戲可能更加實用。

資料來源：Newshub