Sony蜘蛛俠宇宙（SSU）反英雄電影《Morbius（魔比煞）》日前於美國正式上映(香港要等到5月19)，故事講述男主角Michael Morbius（Jared Leto飾）自細患有罕見血液疾病導致身體非常虛弱，行路都要拐杖輔助，身為科學家嘅佢為咗治療自己以及擁有相同絕症嘅病人，不惜以自己身體進行危險治療實驗，結果變成擁有超能力嘅吸血鬼，能夠高速移動及飛翔。

導演Daniel Espinosa日前就向外媒《Uproxx》透露，曾獲奧斯卡最佳男配角嘅Jared Leto對角色極為投入，喺片場就算唔係Roll緊機都用拐杖行路，就連去廁所亦唔例外，結果搞到每次去廁所都花費大量時間，影響拍攝進度。由於Daniel Espinosa認為每個演員都有各自嘅方式融入角色，作為導演應該盡可能支持演員，所以佢就諗到個方法...改用輪椅請人推Jared Leto去廁所。

事實上，Jared Leto向來崇尚「方法演技（Method Acting）」，亦即係一種令演員完全融入角色、創造角色性格及生活嘅表演方式。例如佢喺1999年拍成名作《Requiem for a Dream（迷上癮）》嗰陣，為咗演好癮君子角色而瞓街體驗露宿者生活，又為咗演好《Suicide Squad（自殺特攻：超能暴隊）》「小丑」一角而不斷「整蠱」合作過嘅演員，送真正嘅子彈畀Will Smith。另外仲有將頭髮剷成地中海演《GUCCI名門望族》，增肥60幾磅演《Chapter 27》殺害John Lennon嘅殺手等等。