任可變形 and/or 合體機械人模型，都係男生們兒時最愛嘅玩具之一，亦係大家最常玩爛嘅玩具 (大概沒有「之一」)。或者就係為咗解決呢個問題，所以去年孩之寶就宣佈會於Robosen推出一款聲控、全自動變形嘅Optimus Prime G1，近日正式公佈實機變形過程影片，不得不說個效果係相當驚人，而且個價錢都一樣好驚人！

呢隻Optimus Prime G1變形後約高19寸，造型同普通Optimus Prime G1冇咩分別，最大賣點係內藏27個Servo摩打以及60塊控制晶片，所以能夠做到由貨車頭變成企喺到嘅機械人全自動變形，變形過程亦跟足原作設定。而且除咗可以用手機App透過藍芽控制之外，仲可以聲控！只要一聲令下佢就會自動變形！另外亦可以透過聲控式手機App進行前後左右移動、攻擊等動作，仲可以叫佢擺出一系列甫士，話佢係終極Optimus Prime玩具絕對不為過。難怪售價去到999美金，即係約HK$7,800。

不過未完呀！因為正式推出時，Robosen仲驚喜公佈埋Optimus Prime個貨櫃。全展開時有三尺高，貨櫃本身都可以聲控自動變形，包括整個打開再企喺到嘅武器庫模式，打橫打開露出炮塔嘅戰鬥模式。貨櫃尾門亦可以自動打開，入面可以收埋本身都可以遙控嘅小型戰鬥車「Roller」。而淨係呢個貨櫃嘅原價又要750美金，即係成Set就要近1,750美金，萬三銀港紙左右，真係考驗大家嘅愛啦。

資料來源：Robosen