連載八年嘅日本人氣漫畫《黃金神威》即將完結，而於昨日推出嘅第29集單行本上，亦公佈咗會開拍真人版電影嘅消息。而雖然目前完全冇上映日期、選角以至劇情等情報，但網民就一致認為橋本環奈BB「必定」會係女主角「阿席莉帕」嘅人選，結果於Twitter掀起一股「反環奈BB浪潮」。

《黃金神威》故事發生於日俄戰爭後嘅北海道，原陸軍第一師團士兵，號稱「不死身」嘅「杉元佐一」於退役後為咗完成與死去戰友嘅承諾，於是去咗北海道掘金，期間遇上當地土著「愛奴族」少女「阿席莉帕」，再因而捲入搶奪價值8億日元嘅金塊事件當中。

目前日本網民估計，男主角杉元將由長瀬智也、小栗旬或身材非常好嘅鈴木亮平飾演，當中長瀨智也因為個樣與杉元非常相似而呼聲最高，但反正大家都認為以上幾位都係唔錯嘅選擇。而女主角「阿席莉帕」方面，就幾乎係一面倒認為將由環奈BB出演，畢竟環奈BB近年包辦《銀魂》、《齊木楠雄的災難》、《王者天下》等幾乎所有漫畫改編真人電影中嘅少女角色。但正正就係因為環奈BB出演太多同類角色，所以日本Twitter就出現大量「又係橋本環奈」、「反正都係橋本環奈」嘅聲音，甚至有人反對橋本環奈出演「阿席莉帕」。

網民整嘅長瀨智也飾演杉元幻想圖

《王者天下》真人版電影海報，橋本環奈飾演河了貂一角

當然，橋本環奈之所以能夠包辦大量漫改真人版電影嘅女角，主要都係因為佢嘅號召力、年齡外貌、以及演技 (包括顏藝) 的確係目前日本演藝圈中最適合嘅人選。特別係漫改作品通常都係大量男角加一個女角，要應付到角色，又不被男演員比下去，仲要吸引到觀眾入場，種種因素加埋就導致可以揀嘅人非常少。另一邊廂，作為觀眾見到每套漫改電影都有橋本環奈，感到有啲厭倦又確係合情合理。不過目前片方根本就未公佈演員陣容，依家就開始反環奈BB會唔會有啲太武斷呢？

資料來源：週刊女性 via Livedoor News