如果大家有玩開手機遊戲，應該對於「遊戲內廣告」一啲都唔陌生，甚至已經習慣佢哋嘅存在；不過對於主機玩家們而言，遊戲內出現廣告幾乎係難以想像嘅事，不過未來大家都可能需要習慣一下。因為近日有傳聞指，兩大主機開發商Sony及Microsoft不約而同地研究於今年內推出「遊戲內廣告」功能，以增加遊戲開發商嘅收益——但大家又唔使太大反應住，睇埋落去先呀下。

據《Insider》報導，傳聞Sony正在研究於今年內，為PlayStation平台上嘅「免費遊戲」開放遊戲內廣告功能，其目的就係令免費遊戲開發商能夠透過遊戲本身獲得收入，繼而吸引更多開發商為PlayStation開發遊戲。換言之大家平時玩開、本身就要畀錢買嘅遊戲係不受影響。另外據報所謂嘅「遊戲內廣告」亦唔會係如部份手機遊戲內嘅廣告一樣，彈出黎遮住你成個畫面之餘個交叉仲鬼咁難搵，而係會「難以發現地」放於遊戲場景之中，例如係遊戲世界內嘅街道廣告牌等。而玩家主動去觀看呢啲廣告，亦可以獲得遊戲內嘅鼓勵獎賞。

而《Insider》亦於上週報導，Microsoft同樣會會於今年內，為免費遊戲推出類似功能。

值得一提嘅係，據報Sony及Microsoft本身都唔會從遊戲內廣告中獲利，廣告商嘅錢會由遊戲開發團隊以及廣告中介等人瓜分，但據報Sony考慮緊要求開發商為使用玩家資料而付費。另外Sony及Microsoft亦深知玩家對廣告有抗拒，所以只會於「private marketplace」中出售廣告位置，換言之唔係阿貓阿狗都能夠於遊戲內刊登廣告。

資料來源：Business Insider