現時喺美國巡迴演出嘅DJ Soda，日前因為著住由RIPNDIP贊助嘅「Fxxk You」棉褲搭飛機，而被機組人員以冒犯為由趕落機，甚至唔畀佢換另一條褲，最後DJ Soda只好當場除褲反轉嚟著，先可以上返飛機...

View this post on Instagram

A post shared by DJ SODA OFFICIAL ???????? (@deejaysoda)

DJ Soda喺社交媒體發文大呻，表示前日乘搭美國航空（American Airlines）由紐約前往洛杉磯，喺完成登機手續兼且坐咗埋座嘅情況下，突然被一名機組人員趕落飛機，原因係機組人員認為佢條褲嘅「Fxxk You」字句過於冒犯同不當。

由於DJ Soda當日需要趕往洛杉磯開會，冇辦法改搭另一班機，於是懇請機組人員畀佢續繼留喺飛機，甚至表明可以換褲，但被對方無視及拒絕。最後DJ Soda只好當場除褲，喺同事協助下反返轉條褲嚟著先可以上返飛機，期間機組人員仲諷刺咁話「上機前早就應該除啦」，令佢其後6個鐘飛行時間都感到非常屈辱同不安。

DJ Soda亦提到，佢過去幾過月都有著呢條褲搭飛機，但一直都冇都遇到咩問題。強調自己海外巡演咗8年，第一次遇到呢種不公對待，唔敢相信尊重個人自由嘅美國會發生呢種事，揚言會杯葛美國航空。

事情傳出引起熱烈討論，有網民湧到美國航空社交平台為DJ Soda抱不平，但都有人指出航空公司一向有明文規定唔準身穿冒犯性服裝嘅人登機，唔知大家有咩睇法呢？

???????? https://t.co/frbAPS72DM

— RIPNDIP (@RIPNDIP) April 26, 2022