由周潤發及李修賢主演嘅《喋血雙雄》於 1989年上映時大收近1900萬票房，同時憑住獨特嘅暴力美學，以及肝膽相照嘅浪漫情懷，成功奪得第9屆香港電影金像獎最佳導演及最佳剪接，後來更被評為「最佳華語片一百部」之一，導演吳宇森亦因此名震國際影壇，進軍荷里活。

事隔30多年，吳宇森導演決定同環球影業聯手翻拍美版《喋血雙雄》，預計明年獨家登陸NBC環球集團旗下串流平台Peacock，不過演員陣容尚未公布。由於Peacock尚未登陸香港市場，而且只限美國本地IP觀看，所以想睇嘅朋友到時可能要諗下辦法喇。

查實早喺90年代初，已經有荷里活片商打算翻拍美版《喋血雙雄》，並鎖定由奧斯卡影帝Denzel Washington及Richard Gere主演，但最後不了了之。後來亦有唔少製作人打算翻拍，但通通都拍唔成，近年甚至有傳新版《喋血雙雄》將改為女性飾演主角，並由《黑豹》女星Lupita Nyong’o主演，但實情係點就要等官方正式公布演員人選。