Johnny Depp控告前妻Amber Heard誹謗案繼續開審，Amber Heard連日來坐上證人席作供，日前佢更於庭上指控Johnny Depp以酒樽性侵佢嘅「種種惡行」。近日雙方嘅交戰更延伸到庭外，Johnny Depp團體發聲明嘲諷Amber Heard於庭上「作出生涯最佳嘅表演」，而Amber Heard團隊就反駁「Johnny Depp連望Amber Heard唔敢！」

卻說昨日審訊完結後，Johnny Depp團隊發出聲明，指「正如Depp先生嘅團隊於開場陳述所言，Heard小姐作供時，的確拎出佢成世人最佳嘅表演」 應該係嘲諷Amber Heard連日來於庭上疑似扮喊。聲明隨後寫到：「Heard小姐嘅故仔每日都加啲新嘅、好方便嘅詳情，」暗示Amber Heard老作，「而Depp先生嘅對於被指控呢六年嘅回憶都係始終如一。佢嘅真相——實際上嘅真相，無論係咩環境下都保持一致。」

Johnny Depp團體嘅聲明最後指：「接下來Depp先生的團體所進行的盤問係最能說明問題，而且會挑出Heard小姐複雜的證詞中，希望偽裝成事實嘅種種謬誤。」

或者係因為早排換咗公關團體嘅關係，所以Amber Heard方面亦火速發聲明回歸，而且份聲明仲幾長添。聲明開首先講「隨住證據揭露，Depp先生嘅誹謗指控已經快速崩塌，佢嘅團體亦由控方 (prosecutor) 變成 逼害者 (persecutor)。佢哋話Depp先生個故仔冇變過，考慮到佢輸咗家暴限制令、以及英國誹謗案 (按：當日係告《The Sun》誹謗，唔係Amber Heard)，佢哋或者要諗下改變策略，唔好一味攻擊受害者，又拒絕為自己嘅行為負責。如果佢真係無辜，當日佢點解要向Heard小姐多次道歉，又承諾會『改過自身』？」

「佢哋驚到盡全力阻止有說服力嘅相片及證據於庭上被提出，亦難怪Depp先生連於庭上望一眼Heard小姐嘅勇氣都冇——正如當日於英國案上一樣——而只能低頭畫公仔同偷笑。Depp先生於庭上嘅行為如同佢於婚姻中嘅行為一樣，都係可悲嘅。睇黎佢哋亦只能仰賴目前睇落去輸緊嘅策略：分散陪審團注意力，以及將受害者妖魔化。」

資料來源：People Magazine