唔經唔覺《Elden Ring》已經出咗兩個幾月，唔知各位機迷已經打到幾周目呢？又係咪開始玩到有少少悶？為咗增添更多變化及樂趣，最近有Mod開發者就製作出《Elden Ring》VR Mod，令機迷能夠透過VR裝置以第一人稱視覺挑戰交界地各大BOSS，獲得全新沉浸式體驗！

呢款《Elden Ring》VR Mod由著名開發者LukeRoss所製作，從實機遊片段可以見到玩家走出教堂後，方圓百里景色隨即盡收眼底，彷如真實置身於交界地。對話方塊、道具說明、裝備欄、以及血量等資訊全部以懸浮式視窗顯示，而玩家亦可以見到自己手持嘅武器，騎馬嗰陣向下望仲會見到個馬頭添。

相信大家都會好奇，如果做出「翻滾」及「跳躍」動作嘅話，畫面係咪都會跟住天旋地轉呢？答案係唔會嘅，為咗令玩家降低暈眩感，作者將遊戲設定為角色無論點樣碌地，鏡頭方向都會以玩家現實中嘅動作為主，換言之你真人望住前方嘅話，就算你狂撳「翻滾」閃避敵人攻擊，畫面仍然會保持向前。

目前《Elden Ring》VR Mod已經正式推出，有興趣嘅玩家可以到LukeRoss嘅Patreon頁面了解更多。