以前細個去朋友屋企，一定係一大班男仔輪住打Konami出嘅《Winning》，到近年大家就轉哂打EA出嘅《FIFA》，不過到下年大家就連《FIFA》都冇得打啦——因為EA宣佈《FIFA》將會「改版」，新Game會叫做《EA Sports FC》。

圖片：EA

雖然個名唔同咗，但EA於官網發表嘅公開信就表示「同樣的超棒體驗、模式、聯賽、錦標賽、球會和運動員。Ultimate Team、職業生涯模式、職業球會和 VOLTA Football 皆會囊括其中」，球員、球隊、球場，以及於英超、西甲、德甲、意甲、美職聯等聯賽嘅合作亦會「獨一無二地收錄於 EA SPORTS FC」，睇落去就即係改咗名咁。

早前有報導指，EA方面對於每年都要畀錢向FIFA買「FIFA個名」嘅使用權感到不滿，EA CEO Andrew Wilson曾指出「如果唔係世界杯年，我哋其實就買咗『FIFA』四個字母」。

圖片：截圖自EA

但EA又強調今次唔係改名咁簡單。佢哋話會「確保 EA SPORTS FC 是一個改變的標誌」，同時「很高興能與很多且越來越多的夥伴拓展新的真實遊戲體驗，為全球社區帶來歡樂、包容和沉浸感」，但目前除咗呢幾句口號之外，就再冇實質細節，相信要等到2023年夏天，首隻《EA Sports FC》公佈大家先會知道。

另一邊廂，FIFA方面就依然深信「FIFA」四隻英文字母好值錢，《Verge》引述FIFA主席Gianni Infantion指：「我可以向你保證，有『FIFA』個名嘅足球Game，先係市面上最好嘅足球Game。FIFA 23、FIFA 24、FIFA 25、FIFA 26——FIFA呢個名會永遠長存，而且永遠都係最好嘅」。