當日如Netflix等串流平台受歡迎嘅其中一個原因，係因為佢哋打破咗傳統電視台「定時定候播某個節目」嘅慣例，觀眾可以自己決定幾時收看節目，揀某個週末一次過睇哂十集又得，一部電影攤開幾次睇又得。不過近日有外媒報導，Netflix正研究引入定時定候嘅現場直播節目，莫非打算還原基本步？

據《Deadline》報導，Netflix正初步研究緊開放「直播串流」功能，不過就唔係如Twitch或YouTube一樣有個直播主坐定定對住個Cam嗰種直播，而係針對大型比賽型綜藝節目 (例如選秀節目)，又或劇集、電影特別節目 (例如早前嘅Harry Potter20週年紀念節目) ，等觀眾可以參與即時投票、與嘉賓互動等。另外Netflix近年亦大力發展「棟篤笑」節目，早前曾經舉行「Netflix is a Joke」活動，邀請超過130名搞笑藝人舉行實體Show，並將部份拍下，將會於本月放上Netflix供觀眾重溫。假若Netflix未來真係推出直播串流功能，又真係繼續搞「Netflix is a Joke」，相信有部份表演將會有現場直播。

Netflix研究推出現場直播，背後主要原因當然係今年第一季業績顯示訂閱人數首次下跌，希望以新功能吸引新節目同時留住觀眾。另一個原因就係因為最大對手Disney+已經開始製作現場直播節目。今年2月，Disney+於美國直播奧斯卡金像獎公佈提名名單，完成其首次現場直播，而美國知名綜藝節目《Dancing With the Stars》亦會於今年稍後「轉會」Disney+，成為其首個現場直播節目系列。

資料來源：Deadline