Johnny Depp控告Amber Heard誹謗案，上週休庭幾日後，於美國時間週一 (香港時間今日凌晨) 繼續開審，並繼續由Amber Heard於庭上作供，Johnny Depp代表律師之一Camille Vasquez負責盤問。Amber Heard於庭上作供時，繼續指控Johnny Depp係濫藥、善妒、自殘嘅施暴者。而Camille Vasquez律師就透露點解Johnny Depp於整個審訊都冇正眼望過Amber Heard。

圖片：截圖自Law&Crime Network

Amber Heard昨日於庭上作供時指，「我當時很害怕會有糟糕的事發生於我身上，但我唔想離開佢 (JD)，我太愛佢」。同時佢亦指控JD於二人2015年2月乘坐東方快車號列車渡蜜月時， 曾經於睡房中襲擊佢並鍊住佢條頸，「佢將我推向牆邊並用力捉緊我條頸，感覺上捉咗好長時間」。佢於庭上回憶，指當時自己覺得JD會「殺咗我」。

另外AH亦提到，當佢接到一個與James Franco合作嘅角色之後，JD變得非常妒忌，開始拳打AH、將其推向傢具，AH形容為「地獄般的一週」；AH亦指隨住二人關係變差、爭吵變頻繁，JD會開始自殘，例如用刀割自己嘅手臂、胸口，又會拎煙頭辣自己。

昨日下午開始由JD方律師Camille Vasquez盤問AH。律師質問AH，點解佢聲稱多次被JD襲擊，但只有極少量傷勢照片或醫療紀錄，而AH就回應指，自己因為覺得作為被虐者太羞愧，所以除咗佢自己嘅治療師之外，好少再接受其他醫療處理，而選擇用冰塊消腫或用化妝品掩蓋。但另一邊廂，JD律師亦成功令AH承認，當初佢曾經話過會全數捐出JD繳付嘅700萬美金離婚協議賠償，但目前一蚊都未捐過出去。

另外值得一提嘅係，律師Camille Vasquez於庭上主動提到JD於整場審訊都冇正眼望過AH一事。佢向AH提問道：「Depp先生於整場審訊都冇望過你，對嗎？」AH回答：「就我所知，冇。」律師再問：「而你有望過佢好多次，對嗎？」AH回答：「係，我有。」律師追問：「而你知道點解Depp先生唔會望返你？對嗎？」AH回答：「係。」律師再追問：「係因為佢曾經向你承諾，你唔會再望到佢對眼 (you would never see his eyes again)，對嗎？」而AH就回答：「我冇印象佢有咁講過。」Camille Vasquez要求庭上播出2016年，AH「召喚」JD到三藩市一間酒店時嘅錄音，以佐證JD「唔會望Amber Heard」嘅承諾，Camille Vasquez再問：「佢堅守咗佢嘅承諾，對嗎？」AH就回答：「就我所知，佢唔能夠 (cannot) 望我。」律師糾正：「佢唔會 (won't) 望你，對嗎Heard小姐？」而AH堅持：「佢唔能夠 (can't)。」整個對答期間，Amber Heard一改過往多日哭哭啼啼嘅態度，表現得非常冷靜，並多次嘆氣、反眼，似乎非常不耐煩。

Camille Vasquez之所以會針對「JD點解唔望AH」提問，相信係回應早前AH團隊對外發生嘅聲明，指「如果Depp先生真係無辜」，「點解佢成場審訊都唔夠膽去望Heard小姐一眼？」

資料來源：BBC、People Magazine、Law&Crime Network on YouTube