雖然話大家返工都係為份糧，但一個好嘅老細的確能夠令打工仔「獲得份糧嘅過程」好過得多，相信唔少打工仔心目中亦會有一個「理想老細」嘅形象。近日日本網民「とあるん @toarutoa」就於Twitter列出「原版《龍珠》嘅菲利係理想上司」嘅十大理由，睇完可能你都想做菲利條o靚呀！

原作フリーザが理想の上司と言われる理由 pic.twitter.com/fUUAo092hG

— とあるん (@toarutoa) May 19, 2022

「とあるん @toarutoa」列出嘅十大理由，並引用《龍珠》漫畫舉例。十大理由包括：「就算對部下講嘢都非常有禮貌」、「面對危險場合，會親自去到現場確認狀況」、「能夠發出具體而清晰嘅指示」、「能夠發掘人才」、「有幾千個部下但都記得員工個名」、「有最新醫療用具確保部下健康，相信福利都會好好」、「著重實力，不因種族性別而產生偏見」、「即使員工提出奇怪建議都唔會一嘢否定」、「自身有一定實力」以及「員工犯錯亦會給予時間補救」，並付上例子佐證。

圖片：toarutoa on Twitter

「とあるん @toarutoa」嘅帖文一出，就引來日本網民熱烈討論，當中主要都係贊同菲利係個好上司，甚至認為佢連向敵人講嘢都非常有禮貌，非常有家教。值得一提嘅係，鳥山明老師曾經講過，佢係刻意令菲利以超級有禮貌嘅方式說話，目的係希望能夠與其殘忍行為形成反差，同時與當時普遍漫畫嘅反派講嘢都超粗魯作出對比。