昨日Twitter突然出現一個名為「冨樫義博」嘅用戶，上載咗一張唔知畫緊咩嘅漫畫草稿，並留言指「暫時有4話」。隨後《一拳超人》作畫村田雄介老師、《衝鋒21》原作稲垣理一郎等人亦確認呢個Twitter正正係「富奸」本人，亦即事隔三年幾，「富奸」終於重新開始畫《Hunter》。正當《Hunter》Fans們高興古勒比加終於有望落船之際，亦有人想起兩年前有個《Hunter》Fans表示，於《Hunter》連載再開之前，佢會模仿尼特羅會長每日打一千下正拳。

とりあえずあと4話。 pic.twitter.com/OwoB4ljp1x

— 冨樫義博 (@Un4v5s8bgsVk9Xp) May 24, 2022

《Hunter》對上一次連載已經係2018年嘅事，而日本YouTuber「樽江突撃」於2020年1月，就開始「《Hunter》連載再開前每日一萬下感謝正拳」行動，雖然第二日開始就變成「一日一千下」，但呢兩年以來，佢的而且確每日都打一千下、每日都有拍片紀錄，從無取巧、從無走數。兩年過去，「樽江突撃」件道袍已經爛到衣不蔽體，但佢嘅正拳架勢亦由一開始「堪比撳Lift」到依家蒼勁有力，可見其堅持嘅回報。

昨日《Hunter》連載再開消息傳出後，唔少網民都去「樽江突撃」個YouTube上留言感謝，多謝佢為連載再開出力。而今日「樽江突撃」亦為咗連載再開嘅消息舉行特別直播，重新嘗試一日打一萬拳。到我撰文之時，佢已經打咗近六個鐘，打咗大約5000拳，即係全程要打大約10個鐘！如果大家都想去感受佢對《Hunter》嘅愛，就可以把握機會去睇下啦。