平時大家鍾意食甜嘅餅，定係鹹嘅餅多啲呢？唔使再苦惱喇，最近OREO同RITZ就一齊出咗款二合一夾心餅乾，半鹹半甜滿足晒大家口味，今次真係「兩樣溝埋變做攋尿牛丸吖，笨！」

兩大著名零食品牌OREO及RITZ向來各霸一方，前者以雲呢拿夾心朱古力餅聞名於世，後者嘅芝士夾心餅亦風靡全球，令唔少「為食貓」揀選餅乾嗰時陷入兩難局面。最近佢哋就攜手合作，宣布限量推出二合一夾心餅，一半係OREO，一半係RITZ嘅花生醬夾心（注意：唔係招牌嘅芝士味），加埋總共四層，希望用全新鹹甜組合征服各位味蕾。

但可惜嘅係，呢款聯名產品只限美國發售，而且得1,000盒，於美國東部時間5月26日下午12點於官網正式開賣。話唔定官方見到反應熱烈，之後會考慮變成正式產品呢！