{ SKIP }
文:MenClub 魏文青  
POSTED ON 26 May 2022

Johnny Depp控告Amber Heard誹謗案進入第22日,昨日繼續由JD方傳召多位「反駁證人」,以駁斥AH早前提出嘅論點。當中包括Johnny Depp前女友、名模Kate Moss;早前曾經上庭指AH有兩個人格障礙、憑專業對答深得網民歡心嘅法證心理學家Shannon Curry;來自美國八卦週刊《TMZ》嘅前員工Morgan Tremaine;以及JD本人。

昨日首位作供嘅係以視像會議出席嘅Kate Moss。早前AH曾經作供指,JD曾向其承認,當年與Kate Moss拍拖時 (1994-1998年) ,曾經將Kate Moss推落樓梯,於是當某次AH見到JD衝向其妹妹Whitney時,就立即諗起「Kate Moss、樓梯」,然後出手襲擊JD以「自衛」。

但Kate Moss作供時就否認JD曾經將其推落樓梯,「冇,佢冇試過推我、踢我或者推我落樓梯。」而AH口中所謂嘅「樓梯事件」,Kate Moss就指當時佢與JD正準備離開房間,JD行先,Kate Moss殿後,但因為當時落住大雨,Kate Moss因為失足而跣落樓梯整親個背脊。行先嘅JD因為聽到Kate Moss尖叫而跑返轉頭,將Kate Moss抱回房間並搵醫謢人員黎睇佢。換言之Kate Moss完全粉碎「JD曾推Kate Moss落樓梯」嘅指控,再順手為JD增添暖男形象。

JD方昨日傳召嘅第二位證人,乃係早前曾上庭指AH並冇PTSD (創傷後壓力症)、但有「邊緣人格障礙」及「表演性人格障礙」嘅法證心理學家Shannon Curry (台灣網民暱稱為「香濃咖哩」)。Shannon Curry主要係反駁早前AH方證人Dawn Hughes指AH患有PTSD嘅證詞,Curry醫生指Dawn Hughes「扭曲測試及結果」,又指AH於PTSD相關測試中的確獲得極高分,但考慮到PTSD對患者嘅日常生活會產生重大影響,假若AH嘅病情真係咁嚴重,佢根本就冇辦法出席活動、搞派對、去拍戲,所以佢認為AH於測試中作弊。

隨後JD方出人意表地將JD本人傳召為證人。JD方律師早前於盤問AH時,曾經指係JD幫AH拎到《Aquaman》中嘅Mera一角,當時AH非常錯愕地否認,指係靠自己試鏡返黎。而昨日JD於庭上就指AH嘅說法「Not exactly true」。佢指出當年Amber Heard的確係憑自己試鏡而得到角色,但後來電影決定於澳洲拍攝,而「去澳洲對Heard小姐黎講係個問題」(注:庭上並冇講明係咩問題,但近日澳洲政府確認AH目前仍因為2016年帶兩隻狗入境澳洲時作偽證而被調查,《Aquaman》於2017年開拍) ,於是按AH請求,曾與WB多次合作嘅JD就打電話向多位WB高層解話,JD說:「我只能講最後佢 (AH) 拍得成部戲,希望我某程度上降低咗佢哋嘅擔憂。」

另外JD亦指自己成世人只係食過6、7次搖頭丸 (MDMA),亦否認AH指佢「一次過食8至10粒」,JD指:「係嘅話我死咗啦。」

JD否認發送訊息的一刻,AH露出輕蔑笑容

早前有傳聞指出,AH方都想傳召JD本人重新作證,但可能係考慮到時間問題 (AH方剩餘時間不多,而JD講嘢又出名慢) 最後決定放棄,但JD方傳召JD本人上庭就為AH方製造機會,所以AH方律師Benjamin Rottenborn於交叉詢問JD時可謂無所不用其極。

早前AH指JD於二人喺東南亞乘坐東方快車渡蜜月期間向其施襲,但JD方出示照片指AH當時並冇傷痕,反而係JD左眼下方有瘀傷,再指控係AH於車廂中襲擊JD。Rottenborn再次拎出當時嘅多張照片,指其中某張見唔到佢眼下有瘀傷,而JD就指佢認為張相被人Photoshop過。

隨後Rottenborn又出示一系列佢聲稱係JD發送嘅訊息,其中一個訊息說道:「對!Exactly!Molly個下體係屬於我架!」,另一個訊息就出現「I NEED, I WANT, I TAKE」,相信係想說服陪審團質疑JD嘅人格。值得留意嘅係,JD於庭上就否認自己有發送過呢啲訊息時,AH露出一個極其輕蔑嘅笑容。

值得留意嘅係整單案都冇出現過「Molly」呢個人,所以唔知道呢啲訊息究竟係於咩語境下發出;同時有網民發現訊息紀錄顯示咗4個電話號碼,而訊息方向係「Incoming」,換言之啲訊息好可能係JD於某個群組中「收到」,而非「發送」嘅。另外網民亦搵到,網上流傳有張據說係AH傳予JD嘅裸照,當中AH拎住張紙,而張紙上正正有一句「I WANT, I NEED, GIVE ME WHAT'S MINE」 

Rottenborn隨後出示嘅另一個訊息,顯示JD向朋友們辱罵AH,今次訊息紀錄寫到明係「Outgoing」而JD亦非常爽快地承認訊息係自己發送嘅。訊息寫道「佢 (AH) 去含 Mollusk (應該係講緊Elon Musk) 碌__,而『他』搵咗班垃圾律師畀『她』」、「我好期待將呢個吞精嘅垃圾從我生活中移除!我啱啱遇到個勁__正嘅俄羅斯人,令我發現之前啲時間都花咗喺個便宜脫衣舞女身上」。縱然言語極具侮辱性,但JD於訊息中亦寫到「我唔會去掂佢 (AH),我只能期望上天有理,拎走佢呼吸嘅機會。」

值得一提,Rottenborn於庭上朗讀整段訊息時,AH全程想喊咁樣;而Rottenborn讀完訊息後,JD只係瀟洒地答咗句:「你讀得啱呀」。

由Denis Villeneuve執導嘅史詩科幻大片《Dune: Part Two(沙丘瀚戰:第二章)》叫好又叫座,截止目前全球累計票房高達5.79億美元,於各大影評網站獲得高度好評,就連名導史提芬史匹堡亦給予高度肯定,大讚《Dune 2》 ...
hobby
【影視】史提芬史匹堡大讚《沙丘瀚戰2》:我看過最精彩的科幻電影之一
28 Mar 2024
因為「掌摑事件」而沉寂咗一排嘅Will Smith,今年夏天將聯同老拍檔Martin Lawrence再次回歸大銀幕,繼續搞笑互相鬥嘴。 經典動作喜劇《Bad Boys(重案夢幻組)》最新續集《Bad Boys: Ride or Die(重案 ...
hobby
【影視】Will Smith沉寂兩年回歸!《Bad Boys 4 重案夢幻重組再重組》公開首部預告
28 Mar 2024