{ SKIP }
文:MenClub 魏文青  
POSTED ON 14 Jun 2022

自Johnny Depp控告前妻Amber Heard勝訴已經過咗兩個星期,雙方除咗發出聲明、律師接受採訪外,兩位當事人一直都冇親自現身回應判決。不過敗訴嘅Amber Heard就終於打破沉默,日前接受美國NBC電視台專訪首次親自回應事件。雖然完整訪問就要到美國時間星期五先見街,不過NBC就會一連多日發佈嘅預告。而昨日公開嘅一段預告中,Amber Heard就暗示陪審團被誤導。

喺呢條長大約兩分半鐘嘅預告中,AH向主持人Savannah Guthrie表示,佢唔會理會大家對佢喺屋企、佢嘅婚姻、閂埋門之後發生嘅嘢有咩評價,「我唔認為一個普通人理應要知道呢啲,所以我唔會放喺心上。」隨即話鋒一轉,指責社交媒體對佢唔公平,「但就算你好肯定我應該要得到大家嘅憎恨與刻薄、就算你覺得我講緊大話,我都唔認為你可以望住我對眼,同我講你覺得社交媒體對我有公平嘅描述,你冇可能同我講,你覺得咁樣係公平嘅。」基本上就係延續其律師Elaine Bredehoft早前接受電視訪問時,懷疑陪審團被社交媒體影響嘅論述。

主持人Savannah Guthrie亦向AH問道:「陪審團睇咗你啲證據、聽咗你嘅供詞,但佢哋唔信你,佢哋覺得你講大話。」而AH就展演大家睇到有啲熟口熟面嘅慘樣演技回應:「佢哋 (陪審團) 有咩可能唔得出咁嘅結論?佢哋坐咗喺到不停咁聽咗3個幾星期,由收錢員工 (Paid employee)、再到後期我可以話係唔關事嘅人 (Randos) …」主持人追問:「所以你唔怪佢哋?」AH就回應:「我唔怪佢哋!其實我明,佢 (Johnny Depp)係一個深受愛戴嘅人,大家都覺得認識佢,佢係一個非常好嘅演員…」

主持人指出:「陪審團嘅工作就係唔好畀呢啲嘢影響、佢哋嘅工作就係只睇事實同證據,而佢哋唔信你。」AH就回應:「佢哋坐喺到三個星期聽啲人話我係唔可信嘅人、唔可以信我講嘅每一隻字…」預告到此為止。

縱然AH嘅完整回應要到訪問播出時大家先會知道,但單睇預告公開嘅片段,可以見到AH認為陪審團被社交媒體影響、被JD嘅個人魅力影響、被「唔關事」嘅證人影響,反正就係指陪審團冇聚焦於案件嘅本質,如果唔係佢就唔會輸。似乎就無視咗大家對佢嘅觀感,好大程度係因為佢本人於庭上嘅表現。

值得一提嘅係AH律師Elaine Bredehoft接受訪問時亦曾經講過,佢哋有大量當初協助英國《太陽報》贏得誹謗案嘅證據,無法於美國嘅審訊中呈堂。Elaine Brefehoft早前亦指AH一定會上訴。

資料來源:NBC

每年暑假都係動漫發力之時,而今年暑假除咗有爆紅動漫《SPY x FAMILY間諜家家酒》播出第一季Part 2,仲有《龍珠》推出最新劇場版《龍珠超劇場版:超級英雄》、以及《One Piece》最新劇場版《One Piece Film RED》, ...
hobby
【本地活動】安妮亞喜歡這個! TAMASHII FIGURE FES夏日電影館旺角開催
12 Aug 2022
最近日本玩具廠商Takara Tomy與Canon合作,以無反相機EOS R5及RF 24-104mm f/4 L鏡頭為原型,推出博派「柯柏文 R5」及狂派「Refraktor R5」玩具模型。
hobby
【玩物】Takara Tomy x Canon 聯乘推出《變形金剛》柯柏文 R5模型
12 Aug 2022