美國電視台NBC昨日公開Amber Heard敗訴後首次訪問嘅第一部分。喺長達9分半鐘嘅訪問中，Amber Heard繼續堅稱自己於庭上「講出真相」，更揚言「我到死都會堅持作供中的每一隻字。」但佢同時亦被主持人Savannah Guthrie多次逼問。

訪問一開始，主持人問AH審訊完結已經有一段時間，問佢接受咗個判決未。而AH就露出幾乎成為其招牌嘅猙獰表情，指佢認為判決係「超現實、困難」。主持人追問AH「是否堅持案件中的供詞及指控」，AH就略帶激動地回答：「當然！到死我都會堅持我講過嘅每一隻隻字。」隨後AH又提到，當日佢每次上庭前都要經過大量反對AH、支持JD嘅人，到佢本人出庭作供時，佢又話成個旁聽席都係「大聲而且興奮嘅Jack Sparrow粉絲」。AH形容審訊係佢人生中經歷過最屈辱及可怕嘅事，覺得自己冇被當成「人」看待。

AH又老調重彈，指佢有好多證據冇辦法於此次審訊中呈堂，主持人就反問：「咁會唔會係因為對方嘅律師做得更加好？」AH回答：「佢哋於分散陪審團注意力方面的確做得幾好」。佢又指自己明白，有人會覺得整單審訊只係荷里活八卦，但佢認為「絕對唔止係咁，唔係單單講緊 (美國憲法) 第一修正案保障大家有言論自由…」主持人打斷AH發言並質問：「第一修正案係保障言論自由，但佢唔係用黎保障足以構成誹謗嘅大話。」AH就自行演繹第一修正案，指修正案中嘅「言論自由」，係指「向權力說出真相。」主持人再追問：「係囉，『真相』先係關鍵。」AH就話：「我就係講出咗真相，我向權力說出真相，而我付出代價。」

圖片：NBC

主持人又問到，JD方律師Camille Vasquez於結案陳詞時，曾稱AH於庭上嘅表現為「生涯最佳演技」，而AH就有啲小學雞地反駁：「由一個說服所有人佢對手係較剪嘅演員請嘅律師講呢句？我做緊戲？但我喺庭上聽咗幾個星期，大家都話我係個差勁嘅演員，我點樣同時又好又唔好？」

對於JD方指AH先係關係中暴力行為嘅煽動者，AH就回應：「我冇煽動過，我只係回應。如果你活於長期暴力之中，甚至已經成為日常，你就要適應。」主持人隨即指出：「你話你係回應，但有你承認打人嘅錄音，你有講過『係我開始爭執』喎？』AH就話大家聽到嘅錄影音係「於網上流出而且被修改過」，而庭上播出嘅「20秒錄音證據」，唔能夠代表當日長達2、3小時嘅對話。主持人又追問：「咁你唔可以提交哂成段2、3個鐘嘅錄音做證據咩？」AH就話自己唔係律師，自己只係作為一個「於錄音中承受極大心理、情勢、身體苦難嘅人」而發言。

圖片：NBC

主持人問道：「佢 (JD) 話自己從來冇打過你，你覺得係大話？」AH果斷回答：「係。」主持人又問：「咁其他話見過你撩交嗌嘅證人呢？」AH再次老調重彈：「我親眼見過有人跟紅頂白、支持為佢哋提供生活嘅人…」主持人打斷並質問：「所以佢哋全部都走出黎喺法庭講大話？」AH就縮沙指：「我唔係黎指責啲證人，我只係作為一個坐喺嗰到聽嘅人，發表我嘅睇法。」

訪問片段最後，主持人指JD方律師於訪問中講過，JD之所以會贏，係因為AH「從來唔為自己做過嘅任何嘢負責」，而AH就回應：「於整段關係中我講過、做過好多可怕、令我後悔嘅嘢，幾乎連我自己都認唔出自己。」佢亦承認自己做過「好多、好多、好多錯事」，但就堅稱自己「說出真相」。

資料來源：NBC