近年因為疫情關係，唔少遊戲嘅開發都受到阻礙需要延期上市，甚至出現延期上市後，因為太多Bug、遊戲內容太少而遭玩家們唾棄嘅情況。而前BioWare總經理Aaryn Flynn日前接受訪問時就談到呢個現象，指認為背後原因係「廠商吹得太大啦！」

Aaryn Flynn亦負責《Mass Effect》及《Dargon Age》嘅開發事宜

Aaryn Flynn話，佢認為玩家們對於遊戲嘅評價及不滿係公平嘅：「佢哋想隻Game係好玩嘅、係精緻嘅，佢哋想隻Game對得住佢哋嘅時間。我諗我哋呢行喺呢啲事上承諾得太多、做到嘅又太少。好多時之所以有玩家感到失望，係因為一個工作室或團隊設下一個佢哋根本達唔到嘅目標。」簡而言之，就係遊戲開發商經常於隻Game推出之前吹到好大，令玩家充滿期待，結果隻Game推出後達唔到玩家們嘅期待，自然就引起不滿。

Aaryn Flynn

Aaryn Flynn亦認為，如果遊戲廠商真係想整好隻Game、想玩家們滿意，佢哋就應該更加誠實：「你可以話，『我哋依家就整咗呢啲，其他嘢有啲難度，所以我哋需要多少少時間去整好佢，好過畀啲半成品你哋』。而我認為玩家們都想係咁，佢哋依家有太多選擇，如果你冇內容，佢哋玩到半路就會走去玩其他Game。」

資料來源：videogameschronicle