早幾日大西北大停電，數以萬計居民要渡過冇冷氣嘅炎夏，適逢前天文台台長林超英近日又鼓勵大家節約用電，高呼「唔開冷氣人係唔會死」，令大家再次討論起「開唔開冷氣」嘅問題。而近日日本Twitter亦有人開始討論起夏天應唔應該開冷氣，有人就認為開冷氣雖然要畀多啲電費，但其實係除笨有精！

めちゃくちゃ暑い日に節電とかいうアホなことはしない方がいいです。 pic.twitter.com/z0sg1lLEAh

— テキトー (@sokosokosokosan) June 22, 2022

唔同於香港每個屋企都一定有冷氣，於日本家庭中「冷氣」並非係標準配備，而且唔少日本人都覺得開冷氣要用好多電，所以就算「東京熱」佢哋都唔會開。不過日前Twitter用家「テキトー @sokosokosokosan」就分享咗一張圖，指一日開14個鐘冷氣，電費其實都只係300Yen，一個月頂到盡都係一萬Yen左右；但萬一中暑要入院吊鹽水，一日就已經要五千Yen，埋單大概要三萬至六萬Yen，換言之單單計支出，開冷氣其實係除笨有精。

入院費用と電気代の比較は、学会論文のテーマにもなるほどマジなやつで、ネタではございません。https://t.co/FLAzsz99Wn

— テキトー (@sokosokosokosan) June 22, 2022

「テキトー @sokosokosokosan」進一步貼出日本新聞報導截圖，指出每年死於室內中暑嘅人，有85.2%屋企都係冇裝冷氣，佢話「冷氣係大家嘅生命線」，「節約用電係好重要，但唔好用條命黎換」。另外佢再貼出一個2022年日本調查，透過比對長者因為中暑而入院兩日嘅花費，以及2017年6-9月每逢氣溫高過25度就開冷氣嘅電費，發現整體而言入院費用都係比較高，最少等如開多300個鐘個冷氣，再考慮到長者中暑可能引起嘅健康問題，結論係應該要鼓勵長者開冷氣。