隨住《阿凡達：水之道》將於年底上映，導演James Cameron日前接受電影雜誌《Empire》訪問，透露更多製作過程及細節，同時公開多張全新劇照。

由金像導演James Cameron執導嘅《阿凡達》（Avatar）於2009年上映時席捲全球，大收28.48億美元票房榮登史上最賣座電影，更贏得3項奧斯卡大獎，事隔十多年，各位Fans終於等到續集上映。日前James Cameron接受《Empire》訪問時就分享到製作過程，解釋會用上咁長時間籌備：「我當時同Fox高層講，我願意繼續拍落去，但我唔想一部接住一部咁拍，我想講述一個更龐大嘅故事。就好似依家有套《魔戒》咁嘅小說，然後我哋將佢改編搬上大銀幕。」

當然啦，理想總係美好，但現實又邊有《阿凡達》原著小說可以跟住改編呢？所以James Cameron需要花費大量時間構思好四部續集故事，先可以落手開拍續集電影，而年底上映嘅《阿凡達2》以及2024年上映嘅《阿凡達3》亦係用上「背靠背（back to back）」方式同時拍攝，預計《阿凡達》第4及第5集都會使用相同方法。

《阿凡達：水之道》由James Cameron編劇及執導，故事講述《阿凡達》事件10多年後，前人類軍人Jake Sully同納美人公主Neytiri搬到沿海嘅地方居住，並育有兩仔一女過住幸福快樂生活，但好境不常，威脅再度降臨...預計今年12月15日正式上映。

資料來源：Empire