根據美國版權法，1928年問世嘅第一代米奇老鼠（Mickey Mouse）版權將於2024年到期，意味住到時所有人都可以拎嚟二創或惡搞，並毋須繳付任何版稅。唔知會唔會好似小熊維尼咁，被翻拍成恐怖電影呢？

《Steamboat Willie》劇照

米奇老鼠早於1928年迪士尼卡通片《Steamboat Willie》首度登場，並迅速成為家喻戶曉嘅招牌角色，每年為公司帶嚟巨額收入。然而，隨住美國版權法嘅95年保護期即將屆滿，初代米奇老鼠將於2024年正式走入「公有領域（Public domain）」，公眾毋須繳版稅即可進行二次創作。值得注意嘅係，只有初代米奇老鼠版權會喺2024年到期，迪士尼仍持有其他後續版本嘅米奇老鼠版權，所以就算二次創作都要玩得非常精明同小心，若然表達方式會令人聯想到同迪士尼有關，都有機會被對方起訴。

喺今年初正式進入公有領域嘅原版小熊維尼（Winnie-the-Pooh），就即時被人拎嚟翻拍成血腥真人版電影，唔知到時各大商片又會唔會對米奇老鼠有興趣呢？