摺櫈喺香港素來被稱為十大武器之首，但就算有神裝都要你識得用先可以發揮真正威力，而你又知唔知摺櫈嘅正確用法？日本網民「ボ @cotsu_kotsu」早前就喺Twitter分享點樣用摺櫈有效地打人嘅方法，結果因為知識太冷門同時又有用，結果成為網上熱話。

一般的にパイプ椅子で人を殴る際はクッションがついてない側をぶつけるのが推奨されてますがこれには理由があって、硬い方で殴ると構造上座面が抜けやすく衝撃がモロに入らないので比較的安全なんですね　
少しの気遣いでお互いに気持ちよくパイプ椅子で人を殴れるといいですね

— ボ (@cotsu_kotsu) July 1, 2022

「ボ @cotsu_kotsu」原本係一名業餘畫師，但同時佢亦係一個摔角愛好者，所以佢今次分享嘅其實係一個摔角冷知識。另外亦要講明，佢講嘅摺櫈唔係香港大排檔常見嘅圓櫈，而係日本摔角常見，類似係Office會有嘅方型有靠背嘅摺櫈。

據「ボ@cotsu_kotsu」講，(於摔角比賽中) 如果要用摺櫈黎打人，建議係用「冇櫈背、坐墊嗰邊」，亦即係櫈腳嗰部份黎打人。佢話由於結構關係，如果用櫈腳嗰邊打，張櫈會比較容易解體，睇落去個畫面會更有衝擊力，同時因為接觸面較少，用黎打人雖然都係會痛，但相對地力度會較少，亦唔會真係受重傷。最後佢仲期望大家都可以「稍為小心地用摺櫈舒適地打人」。

悪魔将軍を思い出して検索してみたら論外な殴り方してた… pic.twitter.com/TRg2lXAXly

— アンティー (@mzkK29nxdjaDCxj) July 2, 2022

「ボ@cotsu_kotsu」呢篇貼文獲得超過3.3萬個讚好、1.3萬個轉推。唔少日本網民都話佢唔講真係冇留意摔角選手係點樣用張摺櫈打人；同時亦有人發現，無論係現實中嘅摔角選手，乃至《筋肉人》入面嘅角色，用摺櫈打人時都係用櫈腳去打，非常忠於呢條理論。

同時亦有人發現，如果調轉黎諗，即係如果有日你需要用到摺櫈黎自衛，你應該要用坐墊嗰邊黎打人，咁張櫈會冇咁易爛，續戰力會提高；同時造出嘅傷害亦會較為可觀。大家又學到多樣奇怪嘅知識啦。