法庭及陪審團上月裁定Amber Heard於誹謗前夫Johnny Depp敗訴後，AH方面一直想盡辦法推翻裁決。早前其律師團隊就指7名陪審團中有人嘅實際年齡與紀錄不符，懷疑其身份有問題而要求推翻裁決重審。而法官Penney Azcarate昨日就正式駁回其投訴，一句講哂就係「有問題你又唔早講？」

Azcarate法官於美國時間週三發出法庭公告回應AH方提出嘅多項動議，其中就詳細解釋點解「陪審員嘅年齡冇問題」。Azcarate法官指出，每名陪審團於審訊前都需要於一份問卷填上自己嘅年齡，而份問卷係「符合法規」嘅；同時佢亦指出雙方律師都曾經盤問過陪審團，並且接受其組成及成員，「所以，我們有保證及提供正當程序」。

Azcarate法官又指出，AH方律師早於開庭前5日就已經收到哂所有陪審團嘅資料，幾個星期嘅審訊中又隨時都可以提出反對。簡而言之就即係話如果真係有咁大問題，你老早就應該講咗出黎，唔係等到輸咗先講啦。

AH方律師早前指出，7名有份參與裁決嘅陪審員中，其中一名應該係77歲，但實際出席嘅卻係一位同名同姓、住同一個地址嘅52歲嘅人士，並以此作為要求以「不當審訊」推翻裁決嘅其中一個原因。

資料來源：Washington Post