日本動漫瘋魔全球，但實際上唔少讀者都係透過盜版網站觀看漫畫，出版社嘅利益自然收到損害，所以如集英社等出版商多年來都出書辦法希望取締相關網站。近日一個知名盜版網站「漫畫BANK」嘅主理人就於中國重慶被捕，睇黎係出版社嘅一場勝利，但你睇睇佢個罰款，以及「漫畫BANK」造成嘅經濟損失，似乎都係一場慘勝黎。

據日本CODA (Content Overseas Distribution Association) 於昨日公佈，喺得到重慶政府相關部門協助之下，成功將居住於重慶、於2019年11月至2021年10月期間營運盜版網站「漫畫BANK」嘅一名男子拘捕，並會以侵權等罪名沒收其犯罪收益60萬Yen、再罰33萬Yen，換言之出版社拎返5萬令蚊港紙左右。

但據日本傳媒報導，漫畫BANK於去年11月停止營運前，總訪問量超過9億次，估計對業界造成超過2000億日元，即係過百億港元嘅損失，罰咗嗰幾皮嘢連零頭都稱唔上。CODA亦表示對比損失額，個罰款相對較輕，CODA會與出版社繼續商討挽回損失嘅方法。

圖片：CODA

值得一提嘅係，之所以能夠搵到個營運者，係因為角川、講談社、集英社、小學館四間出版社於去年10月主動向美國法院申請，要求Google公開漫畫BANK營運者嘅姓名、電話、IP地址等資料。最後漫畫BANK於去年11月停運。而拘捕工作，就係由日本福岡警署與中國合作嘅。

資料來源：ITMedia