雖然上季「紅魔鬼」曼聯表現未算特別亮眼，但有C朗拿度加成就始終都係焦點之一。而新一季主場波衫早前亦正式登場，製造商將會係繼2015年後再度合作嘅adidas，其中球會極具標誌性嘅鈕扣polo衣領設計將加入呢件主場波衫。

曼聯呢件新主場波衫以球隊歷史上過往嘅經典球衣設計為藍本，重新加入鈕扣polo衣領設計，領上出現嘅紅色幾何形狀圖案係由曼聯嘅「M」字母中演變出來。而波衫沿用曼聯經典紅色配色，同時加入相同色調條紋設計，與雙肩上嘅黑色三間條紋形成視覺上強烈撞色效果，非常吸晴。

作為adidas設計總監Inigo Turner就表示： 「Polo領係曼聯嘅象徵，見證球會許多光輝時刻。回望球會悠久歷史，我們希望通過呢個設計，向球隊過去經典波衫以及傳奇名宿致敬。我們將用全新視角來演繹代表球隊DNA嘅波衫設計及經典圖案，希望將一貫傳承嘅曼聯DNA融入當下。」

今次新球員版主場波衫更以再生環保物料製成，貫徹adidas可持續發展理念。球員版及球迷版波衫分別搭載HEAT.RDY透氣科技及AEROREADY吸汗物料，時刻保持乾爽舒適，助球員發揮最佳表現。

另外，全新嘅作客波衫亦都正式登場，顏色以曼聯作客波衫經常出現嘅白色為主，配上紅黑三間，及採用經典盾徽設計，致敬曼聯輝煌。球衣低調融入暗紋，更加添上質感。