Johnny Depp控告前妻Amber Heard誹謗一案早於6月初完結，稍早前AH方亦已經向法院正式提出有意上訴。而正當大家等緊呢場「世紀官司」第二回合之時，初審嘅法庭文件就於上週解封，有傳媒審視文件後發現JD方並非大眾認為嘅光明磊落、AH似乎亦唔係大家心目中咁冷酷無情，一時之間網上風向急劇轉變。

圖片：Entertainment Tonight

據《The Daily Beast》報導，佢哋得到超過六千頁嘅法庭文件，當中紀錄咗雙方律師團隊於開審前就甚麼證據可以呈堂嘅交鋒、亦有未於庭上公開嘅作證紀錄。

其中一份文件為AH方團隊以「不相關的私人事情」為任，要求法庭拒絕接納一系列由JD方提出嘅證據，當中就寫明包括「Amber Heard的裸照」、「Amber Heard妹妹Whitney的真人Show片段」、「Amber及Whitney的情史」以及「AH在與JD交往多年前短暫跳艷舞、而且Depp先生魯莽地試圖用作證明Amber曾賣淫的相關證據」。

另外，解封文件亦曝露未於初審公開嘅證人證供。例如AH妹妹Whitney接受JD方律師盤問時，就被問到一位於青年時就因為交通意外過世、AH與Whitney的共同男性朋友「Logan」。JD方多次質問Whitney，AH當時是否正與Logan拍拖，又問AH是否Logan發生意外時的駕駛者、AH後來被吊銷車牌是否與Logan的意外有關。Whitney否定以上所有說法。

圖片：Law & Crime Network

另一邊廂，解封文件中亦有對AH形象有利嘅資料。例如一封AH方律師於AH及JD離婚過程中寄畀AH嘅電郵中，就「乞求」AH重新考慮是否「放棄過千萬美金」。卻說JD係與AH結婚後先去拍《Pirates of the Caribbean 5》，按當地法例，JD嘅數千萬美金片酬同屬「夫妻聯合財產」，即係AH有權分一半。但最終AH堅持放棄，連佢律師都話「你真係講得出做得到，真係唔為錢」。但由於誹謗案法官拒絕接受任何與二人離婚有關嘅證據，所以相關文件未能呈堂。

另外一啲文件則顯示JD方律師以「Depp先生並未聲稱遭到生理或心理傷害」為由，拒絕接受獨立驗傷程序；AH方律師於開審前多次質疑JD方提交嘅相片、錄音係遭修改後嘅版本；JD方多次嘗試制止Ellen Barkin (JD多年前曾短暫約會過嘅女演員、聲稱JD曾向其掟樽)、Dr. David Spiegel (AH方心理治療師證人，於庭上表現奇怪而被網民稱為奇怪博士嗰位)的證供，以及JD與好友Paul Bettany的短訊 (JD話要浸死AH嗰堆)等證據呈堂。