唔知大家有冇發現，當你年紀越來越大，你對於某啲嘢係「新」定「舊」嘅標準就會越黎越模糊。好似《鋼之鍊金術師》呢部作品，由2001年開始連載、2010年完結，距離依家只係十年時間，雖然絕對唔算係「新作」，但話佢「舊」又好似唔太恰當。不過對於日本嘅大學生而言，原來《鋼鍊》已經係「爸爸鍾意睇」嘅漫畫！即刻覺得自己好老呀！

フォロワーの大半を占めるであろう40代以上のひとに軽くショックな情報を記すと、いまの大学生が「はじめて読んだマンガ」には、『ハイキュー!!』『進撃の巨人』等の名前があがります。ハガレンあたりは「父が好きだったので」の枠に移行中。

— 伊藤　剛 (@GoITO) August 4, 2022

卻說東京工藝大學漫畫科教授伊藤剛，日前於Twitter分享佢同學生們於課堂上嘅互動。佢話，當佢問學生們第一部睇嘅漫畫係咩，學生們大多都係答《排球少年》又或《進擊的巨人》，考慮到呢兩部作品都係近十年嘅大熱之作，而且唔少成年人自己都有睇，呢個答案其實唔算出奇。出奇嘅係當伊藤剛同學生講，佢好鍾意睇《鋼之鍊金術師》嘅時候，學生們竟然話「《鋼鍊》係我爸爸鍾意睇嘅」。估唔到2001年開始連載嘅作品，喺依家嘅大學生眼中竟然已經係「上一代」嘅產物！

不過伊藤剛冷靜落黎後，就發現《鋼鍊》其實已經係超過廿年嘅作品，基本上同依家啲大學生一樣咁老。就算係《進擊的巨人》，漫畫由2009年開始、動畫由2013年開始，計返就即係依家班大學生大約9-11歲、小學四至六年級開始爆紅，的確好可能係佢哋第一部睇嘅漫畫，甚至連伊藤剛自己個仔，都係9年前小六時開始睇《進擊的巨人》，依家佢個仔都大學三年級。

伊藤剛頗有感慨咁話，「如果你覺得10年前、20年前嘅嘢都係『最近嘅事』，咁你就真係開始老啦」。