荷里活電影於正式拍攝完成後，好多時都會因為各種原因而補拍畫面，而且由於補拍實在太平常，基本上就同香港演唱會一定有Encore一樣，劇組老早已經規劃好足夠嘅補拍嘅時間。不過近日就傳出預計於11月11日上映嘅《Black Panther 2: Wakanda Forever》，竟然去到7月尾都仲補拍緊，考慮到仲要時間做電腦特效、剪接等工作，時間可謂相當緊逼。

Tenoch Huerta飾演Namor

事情最早係由於《Black Panther 2》中飾演主要反派「Namor」嘅墨西哥演員Tenoch Huerta，於7月尾接受當地電台訪問時爆出。卻說當時主持人問Tenoch Huerta近排過得如何，而Tenoch Huerta就回答：「老實講，其實冇咩分別，我依家都仲幫緊套戲 (《Black Panther 2》) 補拍畫面，可能係隻手嘅動作有少少唔同呀，個鏡頭位置有啲唔同呀咁，每部戲到最後都係會有啲咁嘅瑣碎嘢架啦。」佢隨後再透露，佢哋於訪問幾日前，喺San Diego Comic-Con上完台宣傳後，就立即入廠繼續拍攝，拍到訪問當日 (7月29日) 先係佢第一日得閒。

但Tenoch Huerta強調「一切都盡在掌握中。我感到非常高興、平靜而且滿足。」

Shuri (Letitia Wright飾)

Okoye (Danai Gurira飾)

而據外媒引述知情人士透露，今次嘅補拍之所會咁趕，係因為收到某場試映嘅反應後，Marvel決定更改關於Namor一角嘅細節，而由於呢啲細節可能會影響電影整體，所以要第一時間重拍。另外，除咗Namor嘅戲份之外，據知T'Challa個妹Shuri (Letitia Wright飾) 及侍衛隊隊長Okoye (Danai Gurira飾) 嘅戲份都有修改，當中有唔少畫面都曾被剪入預告當中，所以預告中有大約5%嘅畫面，都唔會於正片中出現。

資料來源：The Direct