Amber Heard早前輸咗與前夫Johnny Depp之間嘅誹謗案，而唔少人都認為佢輸嘅其中一個原因，係因為律師團隊表現不濟，當時網民甚至嘲諷佢哋係「淘寶律師」，與代表JD大放異彩嘅Camille Vasquez形成強烈對比。而近日AH團隊就宣佈，會請另外兩名律師黎代替原有律師團隊，相信係為上訴作準備。同時法律專家亦指佢呢個舉動「聰明」。

圖片：Law & Crime

據外媒報導，AH近日請咗David L. Axelrod 及 Jay Ward Brown兩位新律師，而前律師Elaine Bredehoft就會退居副手「全力協助」。而據AH團隊發出嘅公告，之所以會換律師係因為黎緊嘅上訴中會出現「新證據」，所以需要「不同代表」負責。另外值得一提嘅係，公告中AH團隊繼續將上訴包裝成「保護言論自由的基本權利」，更引用邱吉爾嘅名言「不是尾聲的開始，只是開始的尾聲 (merely the end of the beginning)。

左：David L. Axelrod 右：Jay Ward Brown

圖片：BALLARDSPAHR.COM

大家或者會覺得，AH換律師嘅舉動係因為佢終於頂唔順「淘寶律師」嘅表現，但據國外法律專家指出，呢個其實係「聰明」嘅戰略決定。原因係AH即將迎來嘅，係一單結果由上訴法官決定嘅「上訴案」，與由陪審團決定嘅「普通審訊」有明顯不同，而法律界有專打上訴案嘅專業律師，所以「因為係上訴案而換律師」其實係好普遍嘅舉動。

而新律師David L. Axelrod 及 Jay Ward Brown，於今年較早前就代表《New York Times》打贏與前阿拉斯加州州長Sarah Palin嘅誹謗案。

資料來源：Newsweek