相信大家都喺網上見過「《GTA 6》首部宣傳片」、「(多圖)荷里活女星私密照流出」、「Johnny Depp宣布再演加勒比海盜」呢類引人入勝嘅標題，但當你滿懷期待撳入去嗰陣發現貨不對辦，只見Rick Astley伴隨《Never Gonna Give You Up》音樂翩翩起舞，先察覺原來俾人整蠱！亦即係著名Meme兼網絡惡搞行為「Rickroll」。

事隔30多年，最近保險公司CSAA Insurance Group就高清重製當年MV作新廣告，並邀請到Rick Astley親自演出重現組典，無論服裝、場景、運鏡，就連黑人演員擘凌空一字馬及後空翻等鏡頭亦一一還原，影片上架YouTube短短1日已錄得超過16萬觀看次數。

Rickroll嘅出現可追溯至2007年，當時Rockstar Games喺官網發布備受期待嘅《GTA 4》首條預告片，但由於太多人睇令網站一度崩潰，於是有「熱心」網友以「GTA 4預告片」為題喺外國討論區4chan出文，點知大家撳入條Link就去咗《Never Gonna Give You Up》個MV，從此成為一代經典網絡惡搞，期後呢股熱潮更蔓延到台港各大討論區，至今仍然歷久不衰。

順帶一提，其實《Never Gonna Give You Up》有廣東話改編版，由呂珊主唱。