由One原作、村田雄介重製 (加改編) 嘅《One Punch Man (一拳超人)》，自2015年起播放第一季動畫後就大受歡迎，而繼2019年4月播出嘅第二季之後，動畫官方網站今日就宣佈會製作第三季，並且公開咗新海報。

《One Punch Man》係One於2009開始創作嘅網上漫畫，雖然畫功頗為簡陋，但就因為精彩劇情而成為網上熱話。2012年村田雄介主動聯絡One合作，同年推出村田雄介重製嘅《One Punch Man re-make》，並於《Young Jump》網上版連載，相信大部份漫畫迷首先接觸嘅都係呢個版本。

2015年時，村田雄介版本《One Punch Man》就由著名動畫工作室Mad House製作成電視動畫，憑著絕對不輸村田雄介超強畫功嘅作畫，令作品人氣再創高峰。其中埼玉與波羅斯一戰更加被Fans剪出黎，於網上廣為流傳，就算你未睇過成套動畫，你都好有機會見過呢條片。

對於《One Punch Man》動畫製作第三季，Fans們當然樂見其成，不過官方Twitter上就有唔少Fans留言，希望第三季可以交返畀Mad House製作。事關2019年由J.C.STAFF製作嘅第二季，雖然都唔算得上係「差」，但拍埋Mad House嘅神作第一季就高下立見。

不過目前《One Punch Man》官方只係公佈咗「會有第三季」呢個消息，製作公司、播出日期、集數等詳情都一概未知。Fans要等未來嘅公告啦。

資料來源：onepunchman-anime.net