近年荷里活「政治正確」成風，唔少知名演員、創作人都因為涉及「政治不正確」嘅言論而被業界杯葛，例如《Harry Potter》系列原作者J.K. Rowling就因為早幾年「支持生理性別」嘅言論而被標籤為「恐跨 (性別人士)」，就連主演Daniel Radcliffe及Emma Watson等都曾公開批評其言論，一眾《哈》迷更揚言「愛作品不等與愛作者」，結果去年嘅《哈》電影20週年特備節目《Return to Hogwarts》講哂咁多部電影台前幕後重聚，就係冇請J.K. Rowling (以舊訪問片段代替)。

完整訪問

不過近日J.K. Rowling接受英國著名主持人Graham Norton嘅電台訪問時，就描述咗故事嘅另一版本。於訪問中，二人談到名氣對日常生活嘅影響，J.K. Rowling指自己其實都係可以出街，只係佢唔會行近任何有賣《Harry Potter》週邊嘅地方，於是Graham Norton就順勢提到J.K. Rowling被「排除」於《Return to Hogwarts》一事。而J.K. Rowling就否認自己被「排除」，「佢哋其實係有邀請我嘅，係我自己決定唔去，因為我覺得個節目係關於電影而唔係啲書——事實上都係呀，廿週年係電影廿週年唔係本書廿週年嘛。冇人講過唔好請我去，係我話唔去嘅。」