雖然《Game of Thrones》最後兩季嘅表現，令呢套曾經嘅「神劇」跌落神壇，但早前開播嘅衍生劇《House of Dragon》就一挽頹風大受好評，將系列招牌重新省靚 (至少暫時係啦下)。近日HBO Max更將劇集第一集免費放上YouTube，希望以此召回失去信心嘅Fans！

喺上週日播出系列第三集之前，HBO Max上週五就於官方YouTube發佈咗《House of Dragon》嘅完整第一集，雖然只限美國本土IP觀看，但只要你有適當方法，喺香港一樣都可以睇到呢個發生於《Game of Thrones》前200年、聚焦於Tagarian家族內部鬥爭嘅前傳故事。

HBO Max之所以會免費公開第一集，一來當然係為劇集宣傳造勢，二來大概就係了解到，唔少Fans經歷過《Game of Thrones》最後兩季之後，已經對系列以至HBO失去信心，所以根本就冇去留意《House of Dragon》好唔好睇。免費公開第一集就係話畀大家知，《House of Dragon》係拍得住前期《Game of Thrones》嘅表現，大家返黎睇啦！

第三個原因，就係因為隔離台Amazon Prime嘅《魔戒》前傳劇《The Rings of Power》同樣於上週四開播，而且首播當日就吸引咗2500萬名觀眾，遠遠超出《House of Dragon》首播時嘅1000萬名觀眾。HBO選擇於《The Rings of Power》首播後第二日就突然將《House of Dragon》第一集免費放上YouTube，大概都有吸引一眾奇幻史詩觀眾去訂閱埋HBO Max、睇埋《House of Dragon》嘅意思。唔知大家睇完第一集，又會唔會對系列重拾信心？