關於《GTA6》嘅傳聞大家就聽得多喇，又話男女雙主角、重返Vice City（罪惡城市）、地圖會隨住DLC更新不斷擴張等等，但正所謂「無圖無真相」，一日未有畫面睇都只係得個傳字。然而，近日網上就流出多條《GTA6》實機測試片段，瞬間引起機迷熱烈討論，似乎可信度極高！

綜合外媒報導，最近一位名為「teapotuberhacker」嘅黑客喺遊戲論壇GTAForums曝光多達90條、總時長約50分鐘嘅《GTA6》實機測試短片，以及1萬多行遊戲源代碼，合共高達3.2GB內容，成為Rockstar Games，甚至遊戲界有史以嚟最大規模嘅外洩事件之一。

雖然原帖文已經被刪除，但有關片段已被廣大網民重上傳到Youtube、Twitter、Reddit等平台繼續流傳。從流出內容可見，無論遊戲玩法、人物模組、配音都充滿《GTA》嘅味道，同時亦印證了傳聞所講嘅一男一女雙主角設定、場景設定為罪惡之城邁阿密。

目前開發商Rockstar Games及發行商Take-Two尚未作出回應，唔排除今次洩密事件影響遊戲開發時間。