Netflix首部大尺度原創電影《Blonde（金髮夢露）》將於9月28日正式上架，飾演瑪麗蓮夢露嘅Ana de Armas日前就表示已經做好心理準備，佢嘅裸露戲份將會被全世界瘋傳，雖然感到嘔心，但無辦法控制呢件事發生。

《Blonde》改編自美國作家Joyce Carol Oates同名暢銷虛構小說，並由紐西蘭導演Andrew Dominik執導兼撰寫劇本，講述一代性感女神瑪麗蓮夢露鮮為人嘅一面以及個人私生活，當中包含唔少裸露鏡頭，所以喺美國被列為NC-17級別，即17歲或以下人士不得觀看。

隨住電影即將上架，Ana de Armas日前接受外媒《Variety》專訪時就表示：「我好清楚電影上架後會有啲咩開始瘋傳，確實令人嘔心，齋諗已經覺得心煩。但我無辦法控制呢件事發生，無辦法控制其他人嘅行為，以及佢哋會點樣斷章取義。不過我都冇重新考慮嘅餘地，只係諗到嗰啲片段(裸露鏡頭)將來會被利用就感覺好差。」

不過Ana de Armas亦做好心理準備，強調佢嘅演出並唔係為咗任何人，而係致敬瑪麗蓮夢露，甚至喺電影開鏡前，聯同工作人員造訪瑪麗蓮夢露墳墓，請求對方「允許」拍攝。

其實都唔怪得Ana de Armas會有咁嘅諗法，事關佢喺上年《007：No Time To Die（生死有時）》短暫登場後，除咗人氣再度急升，亦被網友們搵返佢喺早些拍過嘅大尺度電影出嚟瘋狂重溫（單純重溫裸露嗰幕，唔係成套戲），例如《Knock Knock》、《Hands of Stone》、《Sex, Party and Lies》等等。