《Hunter x Hunter》休刊將近4年，昨日終於宣布連載再開，令全球Fans激動不已。模仿尼特羅會長每日打一千下正拳嘅日本YouTuber亦終於可以功成身退！

如果大家有印象，大約兩年前有位日本YouTuber「樽江突撃」下定決心每日打一千下正拳，直至《Hunter》連載再開為止，從不走數、絕無取巧，如事者日復日打咗兩年幾，連件道袍都爛到衣不蔽體，出拳功架亦越嚟越有功架，唔似得起初軟弱無力，堅持咗咁耐，如今終於完成使命。值得一提嘅係，剛好佢打到第一千日嗰時，官方就宣布連載再開，確實係一個美妙嘅巧合。

對於《Hunter》連載再開，「樽江突撃」表示非常高興，亦因為連續打咗咁多日拳，搞到肩膀、腳同腰部患上慢性疼痛，但呢啲都可以透過睡眠改善，所以佢好感激冨樫老師腰痛都願意繼續作畫。至於被問到如果再休刊嘅話，會否繼續打正拳系列嗰陣，佢就話目前並冇呢個打算，認為自己已經再冇呢個動力。

《HUNTER×HUNTER》將於10月24日發行嘅《週刊少年Jump》回歸連載。另外第37卷單行本亦預計會喺2022年11月4日發行。