13年前，金像大導演James Cameron（占士金馬倫）憑首部全3D電影《阿凡達》橫掃多個獎項，更創下29.23億美元票房紀錄，成為史上最賣座電影，至今仍未有作品能打破。隨住續集《阿凡達：水之道（Avatar: The Way of Water）》將於12月15日正在上映，James Cameron日前接受《Total Film》訪問時表示，如果今集票房未如理想，《阿凡達》系列去到第三集就會大結局。

James Cameron表示：「三個月後，市場就會話畀我哋知應唔應該繼續，換句話講，如果套戲唔賣得，我哋拍到第三集就會停，唔會無止境地拍落去。」同時概嘆電影市場今非昔比：「疫情同串流平台雙重打擊下，呢個時代已經同我當初寫《阿凡達》嗰陣唔一樣。或者，我哋能夠提醒觀眾點解要入戲院睇戲，呢部電影絕對做到，但問題係，依家仲有幾多人會在乎呢樣嘢？」

事實上，《阿凡達2》及《阿凡達3》早於2017年採用Back to back形式同時拍攝，因疫情問題延期至依家先上映。除此之外，James Cameron亦籌備緊《阿凡達4》及《阿凡達5》，分別暫定2026年及2028年上映。