美國女星Sydney Sweeney自從出演HBO劇集《Euphoria》(即係幫Zendaya 贏兩屆金球獎女主角嗰套) 後，就因為於劇中多場全裸戲份展現超~~好身材而獲得巨大人氣，而其裸露場面嘅截圖更不停於網上流傳，歷久不衰。過往Sydney Sweeney接受訪問時，就已經提過佢對呢個現象非常反感，近日佢接受《GQ》訪問時，更透露網民癲到會喺佢啲裸體室圖到標記佢啲親戚，令佢高呼「噁心兼不公平」。

Sydney Sweeney日前接受英國《GQ》訪問時透露，佢於《Euphoria》第一季嘅裸露戲份見街之後，觀眾評價兩極，一方面大家當然睇得好開心，但另一邊亦有人認為佢 (個角色) 只係為露而露，同時大家都不停將截圖再放上IG，甚至有人標記Sydney本人啲親戚去睇：「班友癲到Tag埋我啲屋企人，我啲表兄弟姊妹唔需要呢啲嘢囉！成件事又噁心又唔公平！」隨後佢就解釋「唔公平」嘅部份：「個角色 (Cassie Howard) 就係喺學校被人物化，點知現實中嘅觀眾都係咁。」

不過Sydney Sweeney強調，佢並唔會因為呢啲人而刻意「收埋自己」，反而佢仲會刻意演多啲呢啲角色。「成件事都荒謬嘅，我係演員黎架，我演一個角色架嘛，咁樣只會令我更想做啲激嬲大家嘅角色。」咁或者係觀眾之福？