最近外國網站Fandom（類似維基百科嘅網站，主打遊戲、動漫及影視內容）訪問咗5,000位年齡介乎13-54歲熱愛娛樂及遊戲嘅網民，發現有36% Marvel迷對源源不絕嘅MCU電影及劇集感到厭倦，而只有20% DC迷擁有相同感覺。話雖如此，但絕大部份Marvel迷（81%）都表示會繼續睇MCU相關作品，相反只有67% DC迷會咁做，反映Marvel迷忠誠度更高。

調查亦指出Marvel及DC迷之間主要差異，57% DC迷更偏好支持特定1-2個超級英雄，而非整個電影宇宙，而呢方面Marvel迷只佔38%，或者能夠解釋到DC迷點解冇咁易感到觀影疲倦。

自2019年《復仇者聯盟4：終局之戰》後，Marvel電影宇宙就以驚人速度擴張，單係第4階段已經有7部電影及8部電視劇，而且彼此之間亦稍有關聯，代表觀眾如果想了解故事完整脈絡，就要做「功課」睇埋幾部主要劇集，難免會令一般影迷感到觀影疲倦。