作為一個機迷，相信大家一定擁有過唔止一部主機，而雖然唔同主機嘅手掣按鈕位置都差唔多，但唔知點解佢哋就硬係鍾意幫啲掣改個唔同名。而近日有名日本網民就於Twitter上抱怨任天堂Switch及微軟Xbox嘅手掣按鈕搞到人哋好亂。結果獲得超過8萬個網民讚好。

Microsoft と Nintendo はですね、今後めっちゃ協力してですね、ボタンの表記が全て真逆なのをぜひ統一していただけないですかね…まじで困ってるので…。
頼みます。 pic.twitter.com/OuGCQJ42WI

— ひげよし (@HIGEYOSI360) December 7, 2022

呢名叫做「ひげよし @HIGEYOSI360」嘅網民，上週於Twitter發文抱怨任天堂同微軟嘅手掣按鈕令人相當混亂。佢於帖文中貼出任天堂Switch以及微軟Xbox嘅手掣，圖中可見雖然兩個手掣嘅右方都係有A、B、X、Y四個掣，但A、B以及X、Y嘅位置就剛好對調。可以想像到如果有人玩開Switch，習慣咗個X掣喺上方，然後去玩Xbox遊戲要撳X時就會撳錯咗Y。「ひげよし」於Twitter帖文中，就呼籲兩間廠合作，統一按鈕名稱，因為真係好煩。

どっかで拾ったやつですがどうぞ pic.twitter.com/pQz7tRNr6i

— すがさとはゲーミングPCを思索中 (@pitpeaq84) December 7, 2022

回覆中亦有網民整理咗SEGA、任天堂、微軟以及蘋果遊戲嘅按鈕名稱以及代表顏色，發現真係非常容易混淆玩家。好似SEGA及蘋果嘅按鈕名稱雖然與微軟相同，但個顏色就唔一樣。另一邊廂Sony嘅Playstation就因為採用圖形黎做按鈕名稱，所以顯得與別不同，特別易認。

不過又咁講，當年我同一班玩開PS嘅朋友轉會Switch玩「芒亨」，朋友問我點碌開嘅時候，我就下意識答佢「撳X」，結果就睇住佢拔刀……