遊日必去景點、近年大力進軍本港嘅日本「驚安の殿堂 (Donki)」，今早突然宣佈會更換吉祥物，大家熟悉嘅企鵝「Donpen」將會被新角色「ド情ちゃん」取代，而且係即日生效。結果引起日本網民熱烈反對，要求保留「Donpen」。群情洶湧之下，「Donki」社長吉田直樹宣佈會開緊急會議商討對策，並會於日本時間8點公佈結果。

【大切なお知らせ】
ドンキのオリジナルブランド「情熱価格」を皆様に知ってもらいたいという真摯な想いから、この度ドンキ公式キャラクターを「ドンペン」から「ド情ちゃん」に交代する事が決定いたしました。

今後ともド情ちゃんを宜しくお願い致します。 pic.twitter.com/NfWFspOHVz

— 驚安の殿堂 ドン・キホーテ???? (@donki_donki) December 16, 2022

據資料顯示，Donpen自1998年起就係Donki嘅官方吉祥物，有著相當完整嘅人物設定，例如資料顯示Donpen於南極出世但係於東京長大、身體嘅長闊高以及體重都係98cm/kg 等。同時Donpen嘅身影亦佈滿所有Donki分店，由店舖標誌到建築物外牆裝飾，再到店內價錢牌以至海報，通通都有Donpen個樣。而隨住Donki成為旅客遊日必到之處、Donki近年又大力開展如香港等海外市場，Donpen嘅形象就更加為人熟悉。

另一邊廂，「ド情ちゃん」就係全新亮相嘅吉祥物，名字中嘅「ド (Do)」明顯就係代表「Donki」、「情」其實就係Donki於2009年起創立嘅自家品牌「情熱價格」嘅簡稱，再加上佢個外型就係一個「ド」字加上「情熱價格」牌仔，相信Donki就係想力推自家品牌，所以先會更換吉祥物。

多くの方から反響をいただきまして、現在緊急で社内会議を行なっております。20時頃に公式Twitterにて何らかの回答をさせて頂きますのでお待ちください。

— 吉田直樹 NAOKI YOSHIDA (@NaokiYo73846593) December 16, 2022

不過「棄用Donpen」嘅帖文一出，馬上就遭到日本網民大力反對，更有人發起「支持Donpen戰勝ド情ちゃん」嘅「競選活動」，群情相當洶湧。不過值得一讚嘅係，Donki社長吉田直樹好快就親自回覆留言，表示自己會詳細了解事情，隨後於下午宣佈了解大家嘅反應，目前正進行公司內部緊急會議，會於日本時間8點左右，於官方Twitter宣佈結果。反應之快、對民意之重視，絕對值得某啲人學習一下。