受疫情影響及串流平台崛起，近年全球實體院線收入大幅下滑，隨住各國生活逐步恢復正常，最近全美最大連鎖院線AMC就推出全新票價計劃。

AMC日前推出一項名為「Sightline」嘅全新票價計劃，仿照演唱會票價模式，將座位按觀影角度好壞劃分為「Preferred（優選）」、「Standard（標準）」及「Value（超值）」3種票價，簡單嚟講就係中間核心座位票價最貴，前排座位最平，而標準座位票價就同傳統票價相若。

Sightline計劃將於2月10日起率先於紐約、芝加哥及堪薩斯城試行，並只應用喺下午4點後嘅高人流場次，預計後續會擴展到其他地區。大家想唔想香港嘅戲院都效法AMC呢？至少可以比貴少少揀個好啲嘅位。