Netflix黑色幽默喜劇《Wednesday（星期三）》去年11月播出後火速爆紅，上架短短一個月就錄得12.4億小時觀看時數，成為Netflix歷來最受歡迎英語節目第二位，僅次於《Stranger Things（怪奇物語）》第四季。然而，亮麗成績背後卻有不為人知的拍攝祕辛...

女主角Jenna Ortega日前於Netfilx座談會上透露，為演好「Wednesday」一角，佢喺劇集正式開拍前幾個月已報讀劍擊及大提琴課程，並喺為期8個月嘅拍攝期間繼續上堂：「我每日必需提早2個鐘到達片場，拍攝12-14小時，回家仍要透過ZOOM繼續上堂，又或者大提琴老師會直接上門教我。行程日復日，就算有得放假，亦會用嚟上堂。」Jenna Ortega坦言，緊湊嘅行程加上課業壓力令佢幾乎瞓唔著覺，更崩潰到扯頭髮，有好幾次打畀爸爸視象通話時，都係喊到歇斯底里。

然而Jenna Ortega嘅付出並冇白費，《Wednesday》播出後紅遍全球，佢嘅魔性舞蹈更喺網絡上掀起熱朝，吸引一眾名人KOL模仿。官方早前亦確定會開拍第二季，但就未知具體上架日期，希望佢拍第二季嗰陣唔使咁Chur啦。

資料來源：variety