大家或者記得，去年一個小朋友不慎撞跌一個真人大小嘅「天線得得B」模型，商戶向家長索償3萬蚊嘅事件。而近日美國就發生咗一件類似意外，著名藝術家Jeff Koons於邁阿密展出標誌性作品、價值4.2萬美金 (約33萬港元) 嘅「氣球狗」雕像，但卻被一名老婦碰跌並粉碎。

圖片：Keith Major via Veranda

據《BBC》報導，上週四美國邁阿密舉行Art Wynwood藝術展，而其中就有展出由Jeff Koons創作嘅著名氣球狗雕像，而事發當日為藝術展第一晚嘅VIP專場。據有份出席、目擊事發經過嘅另一位藝術家Stephen Gamson於IG發文，當時佢正欣賞緊個「氣球狗」雕像，突然就有一位「老婦人」用手指掂咗個雕像一下，然後個雕像就跌咗落地並粉碎。

Stephen Gamson指，佢一開始以為整件事都係「某種行為藝術」，但好快就發現真係一單意外黎。佢話案發後就如同「車禍現場一樣」，引來大量群眾圍觀。佢亦影到展場嘅工作人員，用掃把垃圾剷清走雕像碎片。

在 Instagram 查看這則貼文

Stephen Gamson（@gamsonart）分享的貼文

到目前為止，整件事同「天線得得B事件」都頗為類似，但後續就有好大分別。該雕像嘅代理人，Bel-Air Fine Art Galleries嘅代表Benedicte Caluch略帶玩笑性質地表示「當時所有人嘅心跳都停咗15分鐘」，同時佢亦透露該名「老婦人」本身亦係一位收藏家，事後不斷向職員表示「非常、非常抱歉」、「我想搵窿捐」。好彩嘅係，由於「氣球狗」雕像有買保險，所以該名老婦人唔需要作出賠償。

更有趣嘅係，由於該雕像本來係限量799個，經此事後只餘798個，Benedicte Caluch笑稱「對其他收藏家黎講係好事」。而上述提及嘅Stephen Gamson亦透露，佢當場就表示有意買下該雕像嘅殘骸，「因為個故事好有趣」。

資料來源：BBC