Marvel對於旗下電影嘅劇情一直守口如瓶，而將接任美國隊長身份的Anthony Mackie，近日接受歌手Kelly Clarkson的個人清談節目《The Kelly Clarkson Show》訪問時，就透露原來演員們要睇劇本，都要經過一系列有如碟報片嘅流程。

卻說於訪問中，Kelly Clarkson詢問Anthony Mackie「能否透露任何有關《Captain America 4》的消息？」，而Anthony就笑稱，佢係於訪問當日先透過電郵收到劇本，訪問時佢仲未打開個電郵黎睇。隨後佢進一步透露，收到嘅所謂「劇本電郵」，其實只係一組密碼，演員們要去到某個特定網站，輸入該組密碼，然後會收到一個現實中嘅地址。演員要再去到該地址與Marvel安排嘅人會面，簽署保密協議，然後透過電腦當場閱讀劇本，當然亦唔可以帶走。

Kelly Clarkson聽到呢個流程後，感嘆道：「佢哋真係唔信人架喎！」，而Anthony Mackie就回答：「佢哋咩人都唔信！」佢亦透露，該名「Marvel安排嘅人」，好多時都係某位年輕實習生，而且通常都黑口黑面，演員們努力睇劇本，佢哋就坐埋一邊食奇多、催促演員快啲睇完，「我同佢講，我有閱讀障礙喎大佬？佢根本就唔理我！」更值得一提嘅係，最後Anthony Mackie都冇透露任何關於《Captain America 4》嘅情報。