今年1月1日時，「鷹眼」Jeremy Renner在美國內華達州家附近剷雪時，為救姪子而被接近6,500kg嘅巨型剷雪車撞倒並輾過，全身三十多處骨折並一度瀕臨死亡。所幸經過手術後成功康復。而近日佢為咗宣傳Disney+ 節目《Rennervations (舊車大改造)》而重新開始活動，並於重傷後首次接受訪問。

在 Instagram 查看這則貼文

Jeremy Renner（@jeremyrenner）分享的貼文

美國電視台「ABC」今早於YouTube發佈Jeremy Renner嘅專訪預告，其中主持人Diane Sawyer問：「你仲記得當時嘅痛楚嗎？」Jeremy Renner頗為輕鬆地回答：「記得！全部都記得，我全程都係清醒嘅。」隨後就播出Jeremy Renner家人回憶事發經過，佢表示意外發生後佢立即跑向Jeremy，見到佢個頭流咗一大灘血，而佢嘅第一個諗法係「佢應該唔掂啦」。另一邊廂，Jeremy 就表示如果同樣嘅事情再發生一次，佢依然會撲過去救出姪仔，主持人頗為驚訝地反問：「你會做多次？」Jeremy 回答：「緊係，架車撞緊去我個姪仔到喎！」

隨後預告播出事發後，Jeremy家人報警嘅電話錄音，當中聽到重傷中嘅Jeremy Renner無力嘅呻吟，以及其家人對佢講：「保持呼吸，加油！頂住呀兄弟！」另外主持人亦提到事發後Jeremy曾以手語同家人講：「對唔住」，而回憶起此事就令Jeremy眼泛淚光。

預告尾聲，主持人再問Jeremy未來會否親自出演電影中嘅特技動作場面，Jeremy就回答：「雖然我失去咗好多血肉同骨頭，但我就被愛同鈦金屬填滿咗。」而當被問到康復後照鏡時，仲見唔見到同一個自己，Jeremy就回答：「我見到一個極幸運嘅男人。」

完整訪問將於美國時間4月6日晚上播出。