之前就同大家介紹過EVA旗下嘅週邊品牌「A.T. FIELD」，佢哋推出嘅工業風產品，雖然對普通人黎講冇咩用，但就靚到令人好想任性地買哂返去。而佢哋最新推出嘅戶外感應燈亦都唔例外，我係完全唔需要呢盞燈，但我就係想買咗佢！

今次嘅產品係與日本燈具品牌Musashi聯手推出。採用1W LED燈泡，以3粒乾電推動。燈嘅本體只有手掌心咁大，配有可以自由彎曲嘅三腳架，無論係座地、座檯定係綁於其他物體之上都非常方便，拆咗個腳架後亦可以用內置磁石吸附於金屬表面。燈頭後方有A.T. FIELD嘅標誌，兩旁嘅支架上就有NERV標誌印花，黑黃配色相當有型。

功能方面有兩種模式，包括長著嘅普通模式，以及自動感應前方熱源嘅感應燈模式，頗適合用黎做室內嘅小夜燈，同時因為盞燈具備IP43防水標準，所以亦可以用作玄關、花園照明、又或者拎去戶外活動時用，必要時仲可以當電筒用。售價方面，EVA Store官網賣緊4,400Yen，即約HK$260左右。

資料來源：EVA Store